APB-man is een van wêreld se beste filmgrimeerders

JAPIE BOSCH skryf (byna 44 jaar gelede): Die APB het nou maar eenmaal baie talent in sy midde. Op die derde verdieping in Aucklandpark werk mnr John Dercksen, 'n proefleser, wat nie net as die beste grimeerdeskundige in Suid-Afrika geag word nie, maar as een van die bestes ter wêreld.

Uit: November 1970

En dis nie sommer net praatjies nie. Kort gelede het mnr Dercksen 'n tydskrif, Der Filmwelt, uit Duitsland ontvang waarin hierdie stelling gemaak word. Behalwe hierdie puik getuigskrif, het hy ook net ná die voltooiing van Die Kandidaat, 'n spesiale toekenning van die SA Vereniging van Rolprentverspreiders ontvang wat hom aanprys as die beste grimeerder in Suider-Afrika.

John Dercksen

Mnr Dercksen wat reeds ses jaar aan die APB verbonde is, het van sy jong dae af 'n belangstelling in die toneel gehad. Hy het sy gewig oral ingegooi en later was hy saam met bekende name soos Gert van den Bergh, Pieter Hauptfleisch (ook 'n proefleser by die APB) en ander, een van die stigterslede van JAATS, 'n Johannesburgse toneelgroep.

Pieter Hauptfleisch

Hy het gereeld toneel gespeel en dikwels ook afgerig. Afgesien van al hierdie bedrywighede het hy ook nog tyd gehad om kleiner rolle in Suid-Afrikaanse en handelsrolprente te speel.

Later het 'n Duitse onderneming hom een van die hoofrolle in Diamonds are Dangerous aangebied. Terwyl hulle met die verfilming besig was, het die vrou wat die grimeerwerk behartig, eendag nie opgedaag nie.

Mnr Dercksen het toe self ingespring en die grimering gedoen.

Sy belangstelling het meer in hierdie rigting geneig en ná 'n bietjie ondervinding is mnr Dercksen in 1958 Amerika toe om 'n kursus in grimeerwerk te voltooi.

Ook hier het hy gewys wat in hom steek deur die kursus wat 'n jaar duur, binne drie maande te voltooi.

John Dercksen besig om Marié du Toit te grimeer met die verfilming van Die Kandidaat.

Mnr Dercksen vertel dat hy reeds in 38 rolprente -- onder meer Majuba, Katrina, Zulu, Dirkie en Banana Beach -- die grimering behartig het. Shangani patrol was die laaste een waarmee hy doenig was.

Daar het sy roem begin. Die filmbase was so beïndruk met sy werk dat hulle hom daar en dan gevra het om all die grimeerwerk vir die fliek te doen.

Buiten rolprentrolle wat hy vertolk het, is mnr Dercksen ook 'n goeie kabaretsanger en neem dikwels deel aan dansvertonings. Hy het ook al 'n keer of wat op die beeldradio in Rhodesië opgetree en die mense gewys hoe hy gesigte verander.

Siegfried Mynhardt

Grimeerwerk is 'n fyn kuns wat baie geduld en vernuf verg. Mnr Dercksen sê dat hy byvoorbeeld met die skiet van Majuba vir drie maande elke dag van die week twee en 'n halfuur aan Siegfried Mynhardt se gesig moes dokter.

Sover bekend is hy ook die eerste en enigste wat daarin kon slaag om 'n swart persoon te grimeer. Met die verfilming van Tokoloshe moes hy 'n seun van 19 jaar "verander" in 'n ou man van by die tagtig -- onnodig om te sê dat dit 'n groot sukses was. -- Hanekraai, November 1970.