Soek iets? Tik 'n woord(e) hieronder en kry al die berigte waarin dié woord(e) voorkom.

13.2.14

Kanniedood fnuik eliminering

PHILIP DEETLEFS skryf: Dit was nie net Perskor se motorpoel in Pretoria wat vir alle praktiese doeleindes niks meer as 'n skrootwerf was nie. In Aucklandpark en Doornfontein het dit ewe vrot gegaan.

As ek reg onthou, was daar net een motor waarop mens vir die langer paaie op kon staatmaak en dit was Gabriel Maphalala se motor omdat hy die eksklusiewe gebruik van die motor gehad het. Gabriel was ook
nie die klas bestuurder wat ooit deur dringendheid/spertye aangevuur was nie en sy motor het eintlik 'n luilekker lewe gelei.

Peugeot 404
Maar die ander motors – hoofsaaklik Peugeot 404's – was 'n koets van 'n ander kleur. Ligte, flikkerligte, bande, windskerms en wie weet wat nog alles was enige verkeersman met 'n pligsbesef teenoor ander motoriste, se prooi. Moeilikheid was dat diesulkes maar dun gesaai was.

Die spesifieke Peugeot 404 wat ek een oggend moes gebruik was regtig nie padwaardig nie, sy uitlaat het soos 'n groot Oshkosh 'n kolom swart rook uitgespoeg wat dalk van die buitense ruim af sigbaar kon wees en die vere in die sitplek het jou boude seergemaak omdat hulle uitgesteek het.

Gabriel
Maphalala
Die motor moes gebreek word sodat dit hopelik deur ʼn nuwe een vervang kon word. Ek kan nie meer onthou of dit Johann van Loggerenberg, André de Bruyn, André de Kock of Evert van Niekerk was wat aanbeveel het om die motor so vinnig en so lank moontlik in die eerste rat te ry tot die enjin vasbrand nie, maar dit wou ek probeer.

Op die M1 het ek oorgeskakel eerste rat toe en die pedaal teen die metaal getrap en gewag dat die rook onder die kap uitkom - of wat dan ookal die simptome van die naderende dood sou wees.

M1-snelweg, Johannesburg
Omdat dit eerste rat was, kon ek nie vinnig genoeg vir die M1-verkeer ry nie en het motors agter my en om my begin ligte flits, vloek en dreigende dinge beduie. Ek het toe besef ek sal die motor meer diplomaties moet breek anders breek die ouens rondom my vir my voor ek die Peugeot breek.

Uiteinde van die saak? Die Peugeot het nog baie lank in die poel van wrakke rondgedryf om ons te frustreer.

(Indien Peugeot se mense hierdie berig lees, moet hulle weet ek sal bereid wees om my nuwe Peugeot vir hierdie reklamewerk by hulle te kom haal as die afleweringskostes Windhoek toe ʼn probleem is).